沉迷衛斯理
最近再一次沉迷於衛斯理嘅小說世界之中。其實呢廿年嚟我都好少再接觸衛斯理，係2013年衛斯理50年嘅果一年，我去咗內蒙古呼倫貝爾旅行，同時倪匡唯一一本長篇愛情小說《呼倫池的微波》再版，我再睇過幾本衛斯理小說而已。
我開始接觸衛斯理係小二果一年，第一本睇嘅小說係《大廈》，我用咗整整一個學期去睇，對一小二學生嚟講，字都未認得哂嘅情況之下要睇得明一個科幻故事，喺一啲都唔容易，但自始我就開始沉迷於衛斯理嘅奇幻世界之中，最迷嘅係高小同初中，真係可以書不離手，甚至乎一日一本咁睇。
但上咗高中就開始放低咗，甚至乎倪匡2005年封筆我都無乜留意，中間斷斷續續咁pick up過幾本咁。以至於2022年倪匡過身果陣，大家都懷緬一翻嘅時候，我都幾proud of自己小二就開始睇衛斯理，而好似沈旭暉、陳韋安呢啲學者都係中學先開始睇佢！
但果陣我都只係重睇咗一本佢第一本《鑽石花》而已。反而今日突然間好想重溫衛斯理，原因竟然係懷緬果個我未曾經歷過六七十年代嘅老香港！
我一直都無乜留意衛斯理寫作嘅時代，最早係1963年，果陣人類仲未登陸月球，果個年代仲有好多世界未解之迷，二次大戰不過完結唔夠20年。
嚟到60年後嘅今日，好多當時好科幻嘅概念同理論，今日睇返竟然有一種講唔出嘅感動！
果陣嘅香港竟然有人可以寫得出咁奇幻似真、60年後都唔覺老土嘅科幻小說，真係覺得好感動。
講起上嚟，我只係會睇衛斯理，佢甚至好似係我一個imagery friend咁，亦可能因為咁，有佢就容不下第二個，金庸、古龍嘅武俠小說也好，甚至係倪匡其他系列例如原震俠、木蘭花也好，我都通通唔好嘅，嘗試過睇，但完全吸引唔到我，只有衛斯理，係伴我成長中，同香港有深深關係嘅其中一個印記。